| |||
| 2012年，膠事頻生，花生價格屢創新高！sosad！相信各位花生友都食到滯！學阿寶話齋：「你班hihi俾我抖下得唔得呀？」趁年尾有時間，不如一齊回顧今年在高登和網絡界發生的種種膠事，消化一下、清清腸胃。 第十位：網絡廿三 驚魂未定 擾釀年多的「網絡廿三條」，惡法將立前被精明網民踢爆，群起捍衛創作及言論自由，大戰政府膠官、版權持有人同無知議員，到後來文藝界、音樂人加入發功，立法雖受拉布事件帶挈而意外暫緩，但是危機隨時再臨，各位網民、創作人務必提高警覺，準備隨時應戰！呢件事對於全港網民都有極大的影響，雖然事件本身唔算膠，但重要性非常高，所以可入選成為十大網絡膠事一員。 硬膠度：1 重要性：10 花生度：8 恥笑度：1 第九位：登報反雙非 本土保衛戰展開 為聲援港媽反雙非，一班高登巴絲打極速為一向不和o既另一著名港媽討論區會員齊齊籌旗登報，廣告出街後社會上迴響甚鉅，既被一眾「道德向左走向右走」指責歧視強國人，又被平機會「指蜢為蝗」老屈，但另一方面卻為香港人帶來強烈共鳴，被視為打響本土保衛戰的第一炮，此後網民多次自發行動，如捍衛正體字、光復上水等等。 硬膠度：2 重要性：9 花生度：5 恥笑度：2 第八位：眾志成城反洗腦 高登公敵也出手 九月初的反洗腦教育運動，十二萬黑衣人合唱《年少無知》、一齊做say no手勢的場面相信好多人都仲記得，除o左學民思潮、學生、家長、正義市民力撐之外，當然仲有巴絲打晚晚o係現場推到完場，就連一o的高登公敵，好似艾辛同Gay軒都轉死性出手支持，唔少巴絲打都話估佢唔到喎！ 硬膠度：2 重要性：10 花生度：5 恥笑度：2 第七位：全港各界熱烈慶祝劉江華落選 所謂「香港要贏，劉江華就要輸」，網民公敵劉江華在立法會選舉意外墮馬，網民旋即成立「全港各界熱烈慶祝劉江華落選委員會」，一小時內過萬人加入，當晚更o係佢o既議員辦事處門外開P，熱烈地彈琴熱烈地唱，祝佢早日安息！RIP！原本呢件事恥笑度甚高可以取得更高位置，但點知佢屍骨未寒，政府就委任佢做政制及內地事務局副局長, 並在世界末日（十二月廿一日）回魂，成功敗部復活！真係要將佢拉低幾位o黎以幫各網民表示不滿！ 硬膠度：5 重要性：5 花生度：8 恥笑度：2 第六位：鄭子誠現象 陰謀情人現形 2012年某日，「鄭子誠」三個字忽然像沙士病毒一樣在高登爆發，無論時事台、娛樂台、創意台……就算去到體育台，都中伏鳥！話題都係關於「究竟鄭子誠有咩陰謀」，大量「完美奸人」舊劇照喪loop，這個現象成因不明，是為「鄭子誠現象」，其後誠哥o係多份報章專訪，仲有自己o既電台節目《音樂情人》多謝巴絲打支持，並揚言：「我淨係想播歌，冇陰謀o架！」係真唔係呀？一諗起你個奸笑我就已經覺得好心寒喇！！ 硬膠度：5 重要性：6 花生度：5 恥笑度：5 第五位：大文豪 水杯跌落地拿返咋沙 周大文豪把心愛的水杯打碎了！在面書發表了一篇悼文！RIP！傢俬舖marketing姐姐仔手多多，好心share給大家看，順手抽抽水，孤芳自賞的悼文變成了與眾同樂的潮文！才華洋溢的巴絲打紛紛改寫之，唐詩版、宋詞版舞文弄墨，巴絲打的 硬膠度：7 重要性：0 花生度：8 恥笑度：8 第四位：龍心--由城市論壇到監倉的傳奇 Andy Warhol話：「在未來，每個人都能成名十五分鐘。」維園謝霆鋒--龍心，十五秒都唔使就成名鳥！o係城市論壇爆出一句「我係三藩市福青幫第二把膠椅……」句o野都未講完就上位鳥，幾個月內由當街練功收o靚、代言online game、玩殘何家淑女、非禮女藝人……到鋃鐺入獄，真係一個「438傳奇」！不過話說回來，究竟又關我地咩事呢？都係花生下就算喇。 硬膠度：8 重要性：2 花生度：9 恥笑度：5 第三位：高登男女神普選 馬明魯芬支持者眾 唔知幾時開始，成為「高登女神」，就變成女星的上位捷徑，可是人人都話係高登女神，硬屈一眾高登巴打！搞到「高登女神」個朵Cheap晒之蝕仲令外界誤會高登巴打口味低俗。於是就有把打發起搞o左個普選，由高登會員自己選出真正o既高登男神女神，結果男神由在三色台台慶被嚇到呆o左、同巴打一樣鍾意睇AV o既宅男馬國明奪得，陰謀情人鄭子誠居次，女神之位則眾望所歸，由黑絲淫Kay奪得，恩娜BB居次，至於經常被傳媒稱為高登女神的岑麗香，排二十位包尾，被第八名的重口味魯芬力壓，糖妹更加係影都唔見！所以希望其他各大八卦雜誌同報章請唔好再老屈我地高登喇！ 硬膠度：8 重要性：8 花生度：8 恥笑度：1 第二位：x你個街！ 王征大戰維基！ 「王征和維基……仇恨史 糾纏於 新牌的發表」（《王征．維基》〈原曲：勞斯．萊斯〉改編詞：山卡啦）王征帶著「良心」，在香港政府總部門外大跳騎呢版Gangnam Style，仲用純正普通話對著香港人毛姨姨大罵：「滾出香港！」，搞到毛議員都要高登絲打上身大串：「傻的嗎？」一膠未平一膠又起，盛董事接力派膠，一句「眾所_知」，維基怎招架？！不如學網民以張家輝金句回應算罷啦！！ 硬膠度：10 重要性：9 花生度：8 恥笑度：10 第一位：五百港女 嫁得巴閉 在面書的一句「給五百人情就不要來了」，惹來全港公憤，被大起底，上A1頭條，呢位準新娘真係巴閉！有人笑佢抵死，有人戥佢陰公！《可不可能還我五舊？》、《貧窮不要來！》YouTube熱播！點都好啦，希望佢「經一事，蔡一智」啦！人o地月尾都嫁咯，厚道o的啦！大家記o係心算喇！唔好再講喇！因為真係講到好向左走向右走悶喇！不過此事本身肯定係本年度網上最膠事件，所以唔講多次同畀個第一佢都唔得，本宮在此衷心祝何小姐同夫君百年好合，永結同心，恭喜恭喜！ 硬膠度：10 重要性：10 花生度：10 恥笑度：10 仲有一個多星期就到2013年鳥！既然到本宮落筆呢一刻世界末日都仲未來臨，相信膠事必會繼續來，所謂一膠還有一膠硬，奉勸大家快o的大手入市花生期貨市場，hold住堆貨，留返來年慢慢食囉喂！ 【同場加映】 以下seven事膠力持久度不足，不過自作有孽，仍值得大家再恥笑一番： ．2011年年度膠歌得主莊冬昕繼《食軟雪糕》後，2012年繼續派膠，連派兩首新作《我要打俾你》同《怪叔叔跳古怪舞》，膠力未及前作，一恥笑無妨！ ．豬狼混戰：「你呃人！」、「我唔清楚、我冇講過、我唔知道！」全年無限loop…… ．三色台《盛女愛作戰》：人生教練、45度角、公主病、惡頂港女、珍禽異獸，明明係真人show，全世界卻當笑片睇，究竟係電視台的悲哀還是觀眾的悲哀呢？ ．香港有個Edison，寶島都出o左個台版Edison李宗瑞，不過佢o的閃卡似乎冇乜吸引力，膠都冇人派俾佢！ ．新科立法會議員元秋激情護主x「香港共和國澳門立法會議員」Tree Gun完美示範錯用成語，二人犧牲小我娛樂大眾，令立法會會議生色不少，不讓人力三子、社記長毛專美，功德無量！ ．樂壇才女年尾發功，高呼：「我討厭政治」！被才子陶傑文字x聲音x網絡三路抽水，抽足成個禮拜，抽到人都dry鳥！ 唔膠，但值得拍手的事： ．一直捍衛港人尊嚴同正體字o既高登男神范國威，o係一眾巴絲打喪推之下，成功當選立法會議員，創造奇跡，佢仲親自o係面書多謝巴絲支持o忝！ ．非師奶劇《天與地》被網民捧為神劇，今年元旦播映大結局後，成為網民心目中的經典，剛在三色台的頒獎禮被網民谷到拎o左「最佳劇集」獎，一眾巴打絲打打算再下一城，喪投票，力推劇集插曲《天少無知》為「我最喜愛歌曲」，加油呀！~~~~~~~如果~~~~命運能選擇~~~~~~仲有呀，《天與地》2013元旦重播喇！ ．由向西村上春樹巴打在高登連載《東莞的森林》，到《一路向西》出書，再到《一路向西》電影上映，都算係高登仔o既一個創舉喇？ By HK Golden | |||
2012年12月22日 星期六
2012年十大網絡膠事回顧
2012 年度網上最瘋傳的攝影作品
超級無敵搶鏡頭的可愛小松鼠
網站 Odd Stuff Magazine 整理出 2012 年最被網友們廣傳的攝影作品，讓大家一次看個夠：
站在單車上的狗 Maddie
使用 GoPro 運動相機捕捉到的衝浪精彩一瞬間
John 和他得關節炎的老狗每晚在海裡潛水減輕疼痛
奧巴馬角逐競選連任的演講活動
奧巴馬連任後擁抱太太米歇爾
西班牙殘奧會運動選手步行回家的畫面
跳入水中撿球的潛水狗狗生動表情
英女皇被人所拍到自行開車的畫面
有如水造型一般的水帽子
勇闖鬼屋被驚嚇到的一家人
特技人 Nick Vallenda 在尼加拉瓜大瀑布走綱線的畫面
攝影師和他所拍攝年度得獎照片大合照
受桑迪颶風肆虐所拍攝到有如末日的場景
跳傘運動員創下人類最高跳傘紀錄 (36,600公尺)
以延時技術拍攝的飛機起飛
稱世界上最好的爸爸和他女兒的親密合照
年輕時的 Steve Jobs (攝於1988年)
羅斯聖彼得堡警察驅趕參加非法音樂集會的民眾
日本太空員 Akihiko 在出太空出任務時的自拍照
首度登上太空的膠雞「卡米拉」
訂閱：
文章 (Atom)